अप्रैल २२, २०१७. मैथिली जिन्दाबाद!!
मैथिली भाषा, मिथिला संस्कृति एवम् मिथिलाक प्रवासी लोकक समग्र हितचिन्तन लेल जानल जायवला विभिन्न भाषिक-सांस्कृतिक-सामाजिक संगठनक एकमुष्ट छाता-संगठन ‘मैथिल समन्वय समिति’ द्वारा मुम्बई मे तरफर मे बिहार केर मुख्यमंत्री नीतीश कुमार केर अभिनंदन समारोहक आयोजन एखन सँ किछुए देर पहिने मुम्बई मे सम्पन्न भेल अछि।
बिहारक सम्माननीय मुख्यमंत्री नीतीश कुमार एहि आयोजन पर खुशी जतेलनि, मुदा महाराष्ट्र दौरा लेल सोचल गेल समय आर कार्यक्रम मे पहिने सँ एहि आयोजनक जनतब नहि रहबाक कारण कम समय उपलब्ध करा सकबाक आत्म-अनुभूति प्रकट केलनि। मैथिल समन्वय समितिक संरक्षक प्रसिद्ध शिक्षाविद् – समाजसेवी एवं सन्दीप फाउन्डेशनक चेयरमैन डा. सन्दीप झा सँ ओ पुनः दोसर बेर कोनो आयोजन मे समय देबाक बात सेहो मंच सँ गछलैन। तहिना मुख्यमंत्री नीतीश कुमार आपसी सहकार्य बढेबाक लेल सेहो डा. झा सँ वादा केलनि आर एहि लेल हुनका खुशी भेटत सेहो भाव प्रकट केलनि।
अभिनंदन सभा केँ कएल गेल संबोधन मे नीतीश कुमार मिथिलावासी बहुल्य उपस्थिति देखि अपन विकासक नीति आ नियति पर सेहो बखूबी प्रकाश दैत कहलनि जे ओ परिवहन मंत्रालय सँ लैत रेल मंत्रालय आर वर्तमान समय मुख्यमंत्रीक रूप मे बिहारक सब भाग मे बराबर विकास पर ध्यान देलनि अछि। स्वर्णिम चतुर्भुज सड़क परियोजना मिथिला क्षेत्र सँ होएत गुजरय ताहू पर ओ अपन योगदानक चर्चा कएलनि आ सभा मे उपस्थित जनमानस सँ विकासक समीक्षा अध्ययन करबाक अनुरोध सेहो कएलनि।
मुख्यमंत्री अपन भाषा शुरु करैत मुम्बई मे मिथिलावासी लोकनि बेसी मात्रा मे रहबाक बात सेहो स्वीकार कएलनि। अपन पार्टीक नेता जार्ज फर्नान्डिस द्वारा महाराष्ट्र नगर निगम केर चुनाव मे प्रचार कार्य हेतु बजेबाक समय एहि यथार्थ सँ परिचित होयबाक बात ओ स्वीकार केलनि। ओ महाराष्ट्रक दौरा पर छथि आर काल्हि बिहार लौटबाक कार्यक्रम छन्हि, एहि बीच डा. सन्दीप झा केर पहल पर एहि तरहक सम्मान कार्यक्रम संभव होयबाक जनतब भेटल अछि।
मैथिल समन्वय समिति केर उच्च पदाधिकारी प्रेमचन्द्र झा समितिक तत्वावधान मे आयोजित मुख्यमंत्री नीतीश कुमार जी केर सम्मान समारोह केँ सुन्दर आ सफल बतौलनि अछि। संगहि एहि सम्मान समारोह मे उपस्थिति देनिहार सब महानुभाव लोकनि केँ मैथिल समन्वय समितिक तरफ सँ आभार सेहो प्रकट कयलनि अछि।
दहेज मुक्त मिथिलाक उच्चाधिकारी एवम् समाजसेवी अभियानी धर्मेन्द्र कुमार झा द्वारा मुख्यमंत्रीक अभिनन्दन समारोह केर लाइव वीडियो प्रस्तुत कएल गेल, जेकर आधार पर ई समाचाल लिखल गेल अछि।
लिंकः
https://www.facebook.com/dharmendrakumar.jha/videos/vb.100001251272084/1464913013560394/?type=2&theater
