दिल्ली, मार्च ११, २०१७. मैथिली जिन्दाबाद!!
बहुचर्चित टैलेन्ट शो ‘राइजिंग स्टार’ जे कलर्स टिवी चैनल पर आबि रहल अछि ताहि मे आजुक एपिसोड मे मिथिला सहित विश्व भरिक सर्वथा प्यारी सुपुत्री ‘मैथिली ठाकुर’ केर परीक्षाक दिन थिक। मैथिली केर प्रतिस्पर्धा समान क्षेत्र ‘शास्त्रीय गायन’ केर चर्चित प्रतिभा सयानी सन परिपक्व आ उमेरगर दिग्गज प्रतिस्पर्धी संग होयबाक प्रोमो २ दुनि सँ सोशल मीडिया पर वायरल भऽ रहल अछि। आजुक राति ९ बजे सँ ई शो कलर्स टिवी पर आओत आर प्रतियोगिताक नियमानुरूप निर्धारित समय मे प्रतियोगी द्वारा अपन प्रतिभाक प्रस्तुति देबाक संग-संगे वोटिंग करबाक आवश्यकता रहैछ। अतः प्रतियोगीक प्रतिभा जिनका नीक लागय ओ जरुर वोट कय केँ अपन पसंदक प्रतियोगी प्रतिभावान टैलेन्ट केँ प्रोत्साहित करी।
आइ त मैथिली ठाकुर लेल समूचा मिथिला सहित विश्वक सब भाग मे एहि नानि टाक स्वर सम्राज्ञीक दिन थिक। आइ कम सँ कम सब मैथिलीभाषी अपन ‘जानकी स्वरूपा मैथिली’ लेर अपन-अपन एन्ड्राइड मोबाईल सेट मे कलर्स टेलिविजनक ‘राइजिंग स्टार’ ऐप्प डाउनलोड कय लेब आर एकदम तैनातीक संग ससमय मैथिली लेल वोट जरुर करब। बुझले अछि जे मैथिली एहेन स्वर केर धनी बालिका खुलेआम अपन मिथिलावासीक वोट सँ स्वयं लेल ९४% मत पाबि पैछला राउन्ड मे विजेता बनबाक बात अत्यन्त निर्दोष मन संग टेलिविजन पर लाइव बजने छलीह, जाहि पर एंकर द्वारा कहलो गेलनि जे, “मैथिली, अहाँक प्रतिभाक सम्मान करैत समूचा देश सँ वोट भेटल, तखन मात्र मिथिलावासी केँ धन्यवाद नहि कय पूरे भारतवासी केँ धन्यवाद करू।” – निश्चित, समूचा देश मैथिलीक गायनक दीवाना बनिकय हुनका लेल वोट कएने छल। आर आइयो ई दिन मैथिलीक हो, यैह कामना करैत कम सँ कम हम सब पाछू नहि पड़ी।
मैथिली ठाकुर सहित समस्त प्रतियोगी लेल शुभकामना!!
