विराटनगर, दिसम्बर १०, २०१५. मैथिली जिन्दाबाद!!
(फोटो फीचर)
प्रमुख अतिथि धीरेन्द्र प्रेमर्षि अपन कविता प्रस्तुत करैत
काल्हि ९ दिसम्बर यानि २३ अगहन बुध दिन विराटनगर केर महावीर चौक पर काव्यात्मक नागरिक खबडदारी सभा सम्पन्न भेल। मैथिली तथा नेपाली भाषाक धुरन्धर कवि एवं स्रष्टा धीरेन्द्र प्रेमर्षि केर प्रमुख आतिथ्य व् प्रस्तुति सँ एहि सभाक गरिमा अत्यन्त उत्कृष्ट छ्ल।
वरिष्ठ कवि दयानन्द दिग्पाल यदुवंशी अपन चीर-परिचित शैलीमे कवितावाचन करैत
पूर्वांचल केर कवि शिरोमणि दयानंद दिग्पाल यदुवंशी तथा मो. अलाउद्दीन मियां बेचैन सहित वसुंधरा झा, राधा मंडल, प्रीती झा, शिव नारायण पण्डित सिंगल, अजित झा, जफर अहमद जमाली, सलीम अंसारी, अजित झा, वीरेंद्र झा, विद्यानंद बेदर्दी, दीपेंद्र यादव मैथिल, मैथिल मैक्स मुकेश, राजन कार्की व प्रवीण चौधरी केर काव्य प्रस्तुति सभा मे कैल गेल।
मशहूर ऊर्दू शायर – जफर अहमद जमाली द्वारा शेर अर्ज करैत समयक विहंगम दृश्य
वर्तमान विद्यमान् मधेस आन्दोलन आर सरकार केर चुप्पी पर चुटकी लैत अनेको रास कविता वाचन कैल गेल। सैकड़ों वर्ष सँ नेपाल मे मधेसी केँ उत्पीडण देल गेल अछि, अधिकारविहीन बनाकय शोषण कैल गेल अछि। समान नागरिक अधिकार लेल संघर्षक रूप मे कैल जा रहल आन्दोलन प्रति समर्थन दैत एहि सभा द्वारा नेपाल सरकार केँ खबरदार कैल गेल। मधेस आन्दोलन केर संबोधन शीघ्र करैत नेपाल मे शान्ति ओ विकासक वातावरण बनेबाक अनुरोध सेहो काव्यात्मक शैली मे कैल गेल छल।
अपन गीत गबैत प्रवीण
विशुद्ध आम जनमानसक सहभागिता में सैकड़ों श्रोता एहि सभाक लाभ लेलनि। मधेसक आंदोलन केँ शीघ्र संबोधन करबाक लेल ई आयोजन स्वतंत्र मधेसी समाज, राष्ट्रीय मुस्लिम संघर्ष गठबन्धन तथा मैथिली सेवा समिति द्वारा कैल गेल।
कार्यक्रमक संयोजन प्रवीण नारायण चौधरी द्वारा कैल गेल छल। मंच संचालन सूर्यदेव यादव केर विशिष्ट शैली मे उपस्थित जनसमुदाय केँ अत्यन्त प्रभावित करैत रहल छल। सभाध्यक्षता स्वतंत्र मधेसी समाजक अध्यक्ष फूल कुमार देव केलनि। तहिना मंच पर विशिष्ट उपस्थिति मैथिली सेवा समितिक अध्यक्ष डा. एस. एन. झा केर रहल। मधेस आन्दोलन केर नेतृत्व कएनिहार नेतृत्वकर्ता व संघीय समाजवादी फोरम नेपाल केर अध्यक्ष राजकुमार यादव केर उपस्थिति किछु समय लेल रहल।
अन्तो-अन्त धरि सुधि श्रोताजनक उल्लेख्य उपस्थिति
राष्ट्रीय मुस्लिम संघर्ष गठबंधन केर क्षेत्रीय नेता सलीम अंसारी द्वारा मिडिया मे आयल समाचार जे गठबंधन आन्दोलन करयवला मोर्चा सँ अलग भऽ गेल अछि ताहि पर आम जनमानस केँ संबोधन करैत कहलैन जे किछु मतभेद भेला सँ एहेन भेल होयत, लेकिन एकरा दूर करैत शीघ्रे एक संग आन्दोलन मे रहब। ओना ओ विराटनगर मे आन्दोलनक नेतृत्व करैत रहबाक वादा सेहो केलैन। अपन फिल्म लाल मधेसक क्रान्तिकारी गीत सहित फिल्मी अभिनेताक अपन रूप सँ उपस्थित श्रोता सबकेँ खूब जोश मे आनि देला जेकर सराहना सब कियो कय रहल छल।
सब कविक प्रस्तुति एक सँ एक रहल। प्रमुख अतिथि व कवि धीरेन्द्र प्रेमर्षिक हास्य कविता ‘हैन्डसम सर…सर..सर ब्युटी मिस’ तऽ सबहक जुबानी पर चढि गेल। कार्यक्रम मे मैथिलीक विशिष्ट गायक विरेन्द्र झा द्वारा ‘मधेस-मधेस-मधेस हम मधेसी छी’ गीत गाबि श्रोता सबकेँ नाचय लेल मजबूर कय देल गेल छल। शान्तिपूर्ण माहौल मे संपन्न एहि कार्यक्रम सँ नागरिक खबरदारी सभाक अपन गरिमा आरो दूर धरि बढल ई मानल जा सकैत अछि।
