मोदी सरकारक ३ वर्ष मे उपलब्धि पर एक दृष्टि

विशेष सम्पादकीय

भारत मे राष्ट्रपति चुनाव नजदीक आबि गेल अछि। राष्ट्रीय जनतांत्रिक गठबंधन द्वारा राष्ट्रपति उम्मीदवार पार्टीक एक पुरान समर्पित नेतृत्व देनिहार वर्तमान समय बिहारक राज्यपाल श्री रामनाथ कोविन्द केर नाम आगू कएल गेल आर एहि नामक संग राजनीतिक पैंतरा सेहो जोड़ि देल गेल अछि जे श्री कोविन्द दलित समुदाय सँ छथि, भाजपा मात्र ओ दल थिक जे एहि तरहें समर्पित कार्यकर्ता आ संगठन केर दृष्टि सँ सामर्थ्यवान नेतृत्वकर्ता केँ कतय सँ कतय पहुँचा सकैत अछि। सोशल मीडिया पर भाजपाक समर्थक तक एहि बात केँ पचा नहि पाबि रहल अछि जे ई कोन नव तरीका सँ भाजपा सेहो आन दल जेकाँ जाति-पाति आ वर्गक नाम लैत पदक सिफारिश करैत अछि। आखिरकार भाजपाक एहि पैंतराक जबाब यूपीए द्वारा सेहो आइ मीरा कुमार – एक दलित परञ्च विगत मे लोकसभा अध्यक्षा रहि चुकल पूर्व प्रधानमंत्री जगजीवन राम केर बेटीक नाम आगू कय देलक। एहि बीच लोकमानस मे मोदी सरकारक ३ वर्षक उपलब्धि पर चर्चा सेहो चलय लागल अछि। सच छैक, आखिर मोदीजीक ३ वर्षक काज कि सब भेल? आम जनधारणा मे २०१९ केर चुनाव पूर्व एहि विषय पर बहस एखनहि सँ शुरु देखा रहल अछि। सोशल मीडिया पर सेहो एहि विषय मे बँटल मत देखैत छी। हालहि अमित शाह जी केर एक साक्षात्कार पढबाक अवसर भेटल नवभारत टाइम्स पर। ताहि अनुरूपे बहुत बात स्पष्ट आ सहमत योग्य बुझा रहल अछि। आउ देखी एक नजरि एहि सम्पूर्ण उपलब्धि परः