मिथिला मे जैविक कृषि पर आधारित औद्योगिक क्रान्तिक संभावनाः मनीष आनन्द

साक्षात्कारः युवा उद्यमी मनीष आनन्द संग

मिथिलाक भूमि देवभूमि एहि लेल मानल गेलैक अछि जे एतय दलदल सँ बसय योग्य भूमि निर्माण यज्ञक माध्यमे आ सेहो सिद्ध माधव विदेह द्वारा पृथ्वीक कल्याणक निमित्त ऋषि-मुनि-ज्ञानीजन केर निवास मे कोनो तरहक तकलीफ नहि हो ताहि परिकल्पनाक संग! जँ परिकल्पना ठोस हो, आधार यज्ञ समान त्यागपूर्ण हवन केर माध्यम स्वयं परमपिता परमात्मा केर आह्वान सँ राखल जायत – त ओतुका प्रकृति, क्षिति, जल, पावक, गगन, समीरा सब कतेक शुद्ध होयत ई स्वतः अनुमान लगायल जा सकैत छैक। हमर उमेर जेना-जेना बीतल जा रहल अछि, तेना-तेना भीतरक सूक्ष्म तत्त्व हमरा ई जनतब दय रहल अछि जे अहाँक जन्म मिथिला मे किछु खास प्रयोजन लेल भेल अछि, ताहि मे एकटा ई अछि जे मिथिला मे आइयो ३३ कोटि देवताक प्रतिनिधि सज्जन पुरुष ओ नारी मनुष्य सहित अन्य-अन्य रूप मे मौजूद छथि, अहाँ हुनका सब केँ ताकू। जतेक हम ताकि सकब से एक पक्ष होयत, बाकी हमर संतति, मित्र, बन्धु आदि ताकैथ यैह हमर आत्मा बेर-बेर कहैत अछि।

मनीषः गाम में व्यापार केनाइ हमर मजबूरी नै वरण रुचि थिक। हमर मत अछि जे खेती स नीक व्यापार अखनो नहि छैक। Change mindset to change your future. मिथिला क्षेत्र में हम कृषि आधारित व्यापार केर बहुत संभावना देखैत छी। जहिया तक जे नै शुरू केने छैथ, तहिये तक देर छैक। हमर कंपनी – Mithila Consumer Goods Pvt Ltd केर फ़ूड प्रोडक्ट्स डिवीज़न मखान केर व्यावसायिक उत्पादन क रहल अछि।मखान बिज़नेस केर हम सब 4 हिस्सा में देखैत छी। 1. Farming 2. Processing 3. Flavouring 4. Branding & Retailing. सम्प्रति मात्र हमर कंपनी इ चारु काज क रहल अछि। मिथिलाक आदिकाल सँ जे परंपरा अध्ययन करैत छी ताहि मे जैविक कृषि – आर्गेनिक फार्मिंग केर महत्व विश्व समुदाय लेल अनुकरणीय अछि। यदि राज्य सरकार चाहय त एहि ठामक युवा केँ दक्ष बनाकय एहि क्षेत्र मे क्रान्ति आनल जा सकैत अछि। एतुका भौगोलिक बनावट आ हिमालय सँ आबि रहल प्रचूर जलस्रोत, पाँक माटिक खेत मे वितरण, आदिक जे इतिहास अछि ताहि दिशा मे सेहो काज करबाक बड पैघ आवश्यकता अछि। एहि ठामक जल-कृषि, फल-कृषि आ अन्न-कृषि सब किछु अनुपम अछि। हताशा केँ दूर करू, अपन गाम केँ फेर सँ सजाउ। एतय औद्योगिक क्रान्तिक सब पूर्वाधार उपलब्ध अछि, बस इच्छाशक्तिक घोर कमी, ताहि तरफ युवा तुरक सक्षम लोक ध्यान दैथ।