मिथिलाक युवा गीतकार व कवि राजदेव राजः विशिष्ट परिचय

व्यक्तित्व परिचयः मैथिली कवि-गीतकार राजदेव राज, चौहर्वा (सिरहा), मिथिला, नेपाल

– विन्देश्वर ठाकुर, दोहा, कतार 

मैथिली जिन्दाबाद सँ प्रकाशित होएत आबि रहल नव सर्जक खोज अभियान अन्तर्गत आइ परिचय करबा’ रहल छी एकटा एहन लेखक सँ जे मूल वासिन्दा त नेपाली मिथिलाक सिरहा जिल्ला मे पड़यवला प्रसिद्ध स्थान चौहर्बा गाम सँ छथि, मुदा एखन वैदेशिक रोजगारीक सिलसिलामे मलेशियामे रहि रहल छथि। करब कि? प्राय: सर्जक विदेशेमे छथि। देशक हाले जे बेहाल छै… आर ताहू पर सँ मधेस सँ विभेद मे मिथिलाक्षेत्र मे त रोजगारक कोनो अवसरो भेटब दुतियाक चान समान छैक । आर ईहो सच छैक जे बेसी सर्जकक केसे मे देखल गेलैक अछि, ओ सब जखन अपन माटि, पानि आ परिजन सँ दूर जाएत छथि, तखन हुनका मे अपन मूल भाषा, संस्कृति, देश, समाज आदि सँ अपनापन केर भावना बेसी उजागर होएत छन्हि आर परिणामस्वरूप ओ सब लोक सृजनधर्मी बनि जाए छथि । आर ओतहिसँ नव इतिहास रचब शुरू भऽ जाएत छैक । एकर ज्वलन्त उदाहरण छथि – कवि राजदेव राज ।