मिथिला मरइ-जियइ तै सँ कि…. मोदीजीक हिसाब धरि हमहीं जोड़ब

हम ई खूब नीक सँ बुझैत छी जे मिथिलावासी केर बौद्धिक सामर्थ्य आर कोनो संस्कार सँ या आवोहवा-सभ्यता सँ बहुत बेसी अछि। एहि सामर्थ्य मे जे अपन क्षमताक सदुपयोग करैत अछि ओ त जीवन सफल करैत अछि, मुदा दुर्भाग्यवश वर्तमान बौद्धिकताक स्तर ओहि कहाबत सब केँ सिद्ध करैत अछि – जेना, ढेर जोगी मठ उजाड़, बेसी बुधियार भेला पर तीन ठाम मखैत छथि, बाजिते टा वीर, करय बेर मुसरी… आदि!

आब देखू जे काल्हि १७ गोट सैनिक केँ आतंकवादी हमला मे मारि देल गेल अछि…. बुझल बात छैक जे काश्मीर मे आन्तरिक उपद्रव आ बाह्य तागत सब एक संग उत्पात मचा रहल छैक, ओकरा सबकेँ भारत सँ स्वतंत्रता चाही, आब स्वतंत्रताक लड़ाई लड़बाक हक ओकरा कोना छैक, कियैक छैक आ ताहि पर भारतक रुखि कि छैक, ऐतिहासिक पृष्ठभूमि केहेन रहलैक अछि… ई सब बात पर बिना सोचने अधिकांश स्वजन्य मैथिल केँ नरेन्द्र मोदीक चुनावी भाषणक एक-एक टा बात मोन पड़य लगलैक अछि।