नई दिल्ली, २५ अगस्त, २०१५. मैथिली जिन्दाबाद!!
नेपाल केर प्रधानमंत्रीक संग भारतीय प्रधानमंत्री केर टेलीफोन पर बातचीत
भारतीय विदेश मंत्रालय द्वारा जारी कैल गेल विज्ञप्तिक मुताबिक नेपालक वर्तमान अशान्ति पर भारतक प्रधानमंत्री चिन्ता व्यक्त करैत नेपाली प्रधानमंत्री सुशील कोइराला संग टेलिफोन पर बातचीत केलनि अछि।
प्रधानमंत्री श्री नरेन्द्र मोदी नेपाल केर प्रधान मंत्री श्री सुशील कोइराला सँ आइ टेलीफोन पर बात केलनि। प्रधानमंत्री मोदी नेपाल मे हिंसा मे मारल गेल लोक प्रति दु: ख व्यक्त केलनि अछि और मृतक सबहक परिजन तथा नेपाली जनमानस प्रति अपन संवेदना संदेश देलनि अछि। प्रधानमंत्री मोदी अहू बात लेल चिन्ता व्यक्त केलनि जे नेपालक राजनीतिक और सामाजिक अस्थिरता हालहि घटित त्रासदीपूर्ण महाभूकंप सँ प्रभावित लोककेर दु:ख-समस्याकेँ आरो बढि जायत।
संयम केर अभ्यास सँ शान्ति आ शासन केर पुनर्बहाली लेल प्रधानमंत्री मोदी माँग केलनि। ओ सरकार सहित समस्त राजनीतिक दल तथा नेपाली जनता सँ हिंसाक बाट त्यागिकय सद्भावना बहाली करबाक लेल अपील केलनि।
ओ नेपाल द्वारा शांति प्रक्रिया और संविधान केर मसौदा तैयार करबाक ऐतिहासिक प्रगति केर सराहना सेहो केलनि। संगहि ओ अपन संदेश देलनि जे सब राजनीतिक दल समस्त जनता आर समाजक सब वर्ग केँ समावेश करैत अधिकतम संभाव्य परामर्शक प्रक्रिया अपनाबैथ, जाहि सँ विश्वास आर भरोसाक माहौल आरो मजबूत बनत, आर वार्ताक माध्यम सँ समस्त लंबित मुद्दाक समाधान निकालैथ जाहि सँ एकीकृत, शान्तिपूर्ण, स्थायी आ समृद्ध नेपाल बनेबाक प्रत्येक नागरिकक जनाकांक्षा केँ पूरा कैल जा सकत।
प्रधानमंत्री मोदी एकटा पड़ोसीक रूप मे भारत द्वारा नेपाल केर सुरक्षा वास्ते ओ सब सहयोग कैल जेबाक वचन देलनि जे भारत कय सकैत अछि। प्रधानमंत्री मोदी कहलनि जे भारतक एकमात्र इच्छा नेपाल मे शान्तिपूर्ण माहौल, स्थिरता, प्राजातंत्र आर समृद्धिक निर्माण मे सहयोग करब अछि, अपन समकक्षी प्रधानमंत्री कोइराला सँ समृद्ध सामाजिक विविधता, विशाल संसाधन और असाधारण प्रतिभा सँ राष्ट्र केर ताकत भेटबाक बात सेहो कहलैन। ओ दोहराबैत कहलैन जे प्रत्येक नेपाली नागरिक केर जनाकांक्षा अनुरूप यैह लक्ष्य केर प्राप्ति केँ प्राथमिकता दैत भारत हरसंभव मदैद नेपाल केँ करैत रहत।
