नवधा भक्तिक अपूर्व उदाहरण: शबरी माता

शबरीक ऐँठ वैर भगवान् राम बड हलैस कय खेलनि। शबरी जखन कि भिलनी जातिक अछूत मानल जाइत छलीह ओहि समयक समाज मे। शबरी एकटा निकृष्ट अछूत परिवारक रहितो मन मे बच्चहि अवस्था सँ एकटा निर्भीक निर्णय केने छलीह, जे एहेन निकृष्ट जीवन – लोक-समाज लेल अछूत बनि धरती पर पैदा लेल जीवन सँ कि लाभ, बरु भगवान् केर सुमिरन करनिहारक संग यदि जीवन बितायब तऽ जरुर हमरो कल्याण भऽ जायत। एतेक सोचि ओ अपन जीवन मे विरक्तिकेँ अंग लगबैत वन गमन केलनि आ एकटा साधूक कुटिया पर पहुँचि ओतय सेवा करबाक अवसर माँगि ओतय रहल लगलीह। हुनक सेवा आ समर्पण सँ गुरु एतेक प्रसन्न भेलाह जेकर चर्चा फेर कोनो दोसर दिनक आलेख मे करब। एतबे संछेप मे बुझल जाउ जे शबरीक भक्ति सँ गुरु एतेक प्रभावित भेलाह जे अन्ततोगत्वा ओहि साधूक आश्रम पर पूर्ण अधिकार शबरी केँ सौंपि ओ समाधिस्थ भऽ गेलाह, हलाँकि एहि बीच शबरी पर कतेक प्रकारक अत्याचार बाकीक जलनशील साधू समाज केलनि, गुरु पर्यन्त केँ आक्षेप लागल आ शबरीक अनेको प्रकारक परीक्षा भेलो पर साक्षात् परमेश्वरक कृपा सँ ओ सब दिन निश्छल-निष्कलंक आ समर्पित रहलीह। हुनका गुरु द्वारा देल एकटा अपूर्व वचन जे ‘अहाँ अपन भक्ति मे लीन रहू, ईश्वर तऽ ओानहू सदिखन अहाँक संग छथिये, मुदा ओ अहाँक एकमात्र अभीष्ट इच्छा जे एक दिन प्रभुजी सँ साक्षात्कार होयत, से जरुर पूरा होयत’ – एहि पर अडिग रहैत शबरी नित्य जंगल सँ मीठ-मीठ वैर तोड़ि राखैथ जे आइये कहीं प्रभुजी नहि आबि जाइथ… हुनका भोग लगायब तऽ एहि लेल मीठ वैर तोड़ि रखैत छी। अन्त मे एक दिन सही मे भगवान् राम आबिकय हुनका संग बैसिकय ओहि जूठ वैर केँ बड प्रेम सँ भोग लगबैत छथि।