गीताक आठम् अध्याय – अक्षर ब्रह्मं योग

भावार्थ : अर्जुन पुछलनि – हे पुरुषोत्तम! ई “ब्रह्म” कि अछि ? “अध्यात्म” कि अछि ? “कर्म” कि अछि ? “अधिभूत” केकरा कहल जाइछ ? आर “अधिदैव” के कहाइत छथि ? (१)

भावार्थ : हे मधुसूदन! एतय “अधियज्ञ” के थिकाह ? आर ओ एहि शरीर मे कोन प्रकारे स्थित रहैत छथि ? आर शरीर केर अन्त समय मे आत्म-संयमी (योग-युक्त) मनुष्य द्वारा अपने केँ कोन तरहें जानि जाइत छथि ? (२)

भावार्थ : श्री भगवान कहलनि – जे अविनाशी छथि वैह “ब्रह्म” (आत्मा) दिव्य छथि आर आत्मा मे स्थिर भाव “अध्यात्म” कहाइत अछि तथा जीव केर ओ भाव जे कि नीक या बेजा संकल्प उत्पन्न करैत अछि से भाव केर मेटा गेनाय “कर्म” कहाइत अछि । (३)

भावार्थ : हे शरीरधारी मे श्रेष्ठ अर्जुन! हमर अपरा प्रकृति जे कि निरन्तर परिवर्तनशील अछि अधिभूत कहाइत अछि, आ हमर ओ विराट रूप जाहि मे सूर्य, चन्द्रमा आदि सब देवता स्थित अछि वैह अधिदैव कहाइत अछि आर हमहीं प्रत्येक शरीरधारीक हृदय मे अन्तर्यामी रूप स्थित अधियज्ञ (यज्ञ केर भोक्ता) छी । (४)

भावार्थ : जे मनुष्य जीवनक अंत समय मे हमरे स्मरण करैत शारीरिक बन्धन सँ मुक्त होइत अछि, से हमरहि भाव केँ अर्थात हमरे प्राप्त होइत अछि एहि मे कनिकबो सन्देह नहि अछि । (५)

भावार्थ : हे कुन्तीपुत्र! मनुष्य अंत समय मे जाहि-जाहि भाव केर स्मरण करैत शरीर केँ त्याग करैत अछि, ओ ओहि भाव टा केँ प्राप्त होइत अछि, जाहि भाव केँ जीवन मे निरन्तर स्मरण कएने अछि । (६)

भावार्थ : ताहि लेल हे अर्जुन! अहाँ हर समय हमरहि स्मरण करी आ युद्ध सेहो करी, मन-बुद्धि सँ हमर शरणागत भ’ कय अहाँ निश्चित रूप सँ हमरहि प्राप्त होयब । (७)

भावार्थ : हे पृथापुत्र! जे मनुष्य बिना विचलित भेने अपन चेतना (आत्मा) सँ योग मे स्थित होयबाक अभ्यास करैत अछि, ओ निरन्तर चिन्तन करिते ओहि दिव्य परमात्मा मात्र केँ प्राप्त होइत अछि । (८)

भावार्थ : मनुष्य केँ ओहि परमात्माक स्वरूप केँ स्मरण करबाक चाही जे कि सब केँ जानयवला छथि, पुरातन छथि, जगत केर नियन्ता छथि, सूक्ष्महु सँ सूक्ष्म छथि, सभक पालनकर्ता छथि, अकल्पनीय-स्वरूप छथि, सूर्यक समान प्रकाशमान आ अन्धकार सँ बहुत अलग स्थित छथि । (९)

भावार्थ : जे मनुष्य मृत्युक समय अचल मन सँ भक्ति मे लागल, योग-शक्ति द्वारा प्राण केँ दुनू भौंह केर मध्य मे पूर्ण रूप सँ स्थापित कय लैत अछि, ओ निश्चित रूप सँ परमात्माक ओहि परम-धाम मात्र केँ प्राप्त होइत अछि । (१०)

भावार्थ : वेद केर ज्ञाता जिनका अविनाशी कहैत छथि तथा बड़-बड़ मुनि-संन्यासी जिनका मे प्रवेश पबैत छथि, ओहि परम-पद केँ पेबाक इच्छा सँ जे मनुष्य ब्रह्मचर्य-व्रत केर पालन करैत अछि, से विधि केँ अहाँ सँ संक्षेप मे बतबैत छी । (११)

भावार्थ : शरीर केर सब द्वार केँ वश मे कयकेँ तथा मन केँ हृदय मे रोकिकय, प्राणवायु केँ सिर मे रोकिकय योग-धारणा मे स्थिर भेल जाइत अछि । (१२)

भावार्थ : एहि प्रकारे ॐकार रूपी एक अक्षर ब्रह्म केर उच्चारण कयकेँ हमर स्मरण करिते शरीर केँ त्याग कय जाइत अछि, ओ मनुष्य हमर परम-धाम केँ प्राप्त करैत अछि । (१३)

भावार्थ : हे पृथापुत्र अर्जुन! जे मनुष्य हमर अतिरिक्त आन केकरहु मन सँ चिन्तन नहि करैत अछि आ सदैव नियमित रूप सँ हमरहि टा स्मरण करैत अछि, ओहि नियमित रूप सँ हमरहि भक्ति मे स्थिर भक्तक लेल हम सरलता सँ प्राप्त भ’ जाइत छी । (१४)

भावार्थ : हमरा प्राप्त कयकेँ ओहि मनुष्य केँ एहि दुःख-रूपी अस्तित्व-रहित क्षणभंगुर संसार मे पुनर्जन्म कहियो नहि होइत छैक, बल्कि ओ महात्मा परम-सिद्धि केँ प्राप्त कयकेँ हमर परम-धाम केँ प्राप्त भ’ जाइत अछि । (१५)

भावार्थ : हे अर्जुन! एहि ब्रह्माण्ड मे निम्न-लोक सँ ब्रह्म-लोक धरिक सबटा लोक सब मे सब जीव जन्म-मृत्यु केँ प्राप्त होइत रहैत अछि, मुदा हे कुन्तीपुत्र अर्जुन! हमरा प्राप्त कयकेँ मनुष्यक पुनर्जन्म कहियो नहि होइत छैक । (१६)

भावार्थ : जे मनुष्य एक हजार चतुर्युगक ब्रह्माक दिन आर एक हजार चतुर्युगक ब्रह्माक राति केँ जनैत अछि से मनुष्य समयक तत्व केँ वास्तविकता सँ जानयवला होइत अछि । (१७)

भावार्थ : ब्रह्माक दिन केर शुरुआत मे सब जीव ओहि अव्यक्त सँ प्रकट होइत अछि आर रातिक शुरुआत मे पुन: अव्यक्त मे विलीन भ’ जाइत अछि, ओहि अव्यक्त केँ मात्र ब्रह्म केर नाम सँ जानल जाइत अछि । (१८)

भावार्थ : हे पृथापुत्र! वैह एहि समस्त जीव केर समूह बेर-बेर उत्पन्न आर विलीन होइत रहैत अछि, ब्रह्माक रातिक एलापर विलीन भ’ जाइत अछि आ दिन एलापर फेर स्वत: प्रकट भ’ जाइत अछि । (१९)

भावार्थ : लेकिन ओहि अव्यक्त ब्रह्म केर अतिरिक्त शाश्वत (अनादि-अनन्त) परम-अव्यक्त परब्रह्म छथि, से परब्रह्म सब जीव केर नाश भेलहु पर कहियो नष्ट नहि होइत छथि । (२०)

भावार्थ : जिनका वेद मे अव्यक्त अविनाशीक नाम सँ कहल गेल अछि, हुनकहि परम-गति कहल जाइत अछि जिनका प्राप्त कयकेँ मनुष्य कहियो वापस नहि अबैत अछि, वैह हमर परम-‍धाम थिक । (२१)

भावार्थ : हे पृथापुत्र! ओ ब्रह्म जे परम-श्रेष्ठ छथि, जिनका अनन्य-भक्ति द्वारा टा प्राप्त कयल जा सकैत अछि, जिनका अन्दर सब जीव स्थित अछि आर जिनकर कारण सारा जगत देखाय पड़ैत अछि । (२२)

भावार्थ : हे भरतश्रेष्ठ! जाहि समय मे शरीर केँ त्यागिकय जायवला योगी लोकनिक पुनर्जन्म नहि होइत अछि आ जाहि समय मे शरीर त्यागलाक बाद पुनर्जन्म होइत अछि, ताहि समय केर बारे मे बतबैत छी । (२३)

भावार्थ : जाहि समय ज्योतिर्मय अग्नि जरैत रहैत अछि, दिनका पूर्ण सूर्य-प्रकाश रहैछ, शुक्ल-पक्षक चन्द्रमा बढ़ैत रहैछ आ जखन सूर्य उत्तर-दिशा मे रहैत अछि ‍‍- एहि छः महीनाक समय मे शरीर केर त्याग करयवला ब्रह्मज्ञानी मनुष्य ब्रह्म केँ प्राप्त होइत अछि । (२४)

भावार्थ : जाहि समय अग्नि सँ धुआँ पसैर रहल हो, रात्रिक अन्धकार हो, कृष्ण-पक्ष केर चन्द्रमा घटि रहल हो आ जखन सूर्य दक्षिण दिशा मे रहैत अछि – एहि छः महीनाक समय मे शरीर त्यागयवला स्वर्ग-लोक केँ प्राप्त भ’ अपन शुभ कर्म सभक फल भोगिकय पुनर्जन्म केँ प्राप्त होइत अछि । (२५)

भावार्थ : वेदक अनुसार एहि मृत्यु-लोक सँ जाय केर दुइये टा शाश्वत मार्ग अछि – एकटा प्रकाशक मार्ग आर दोसर अंधकारक मार्ग, जे मनुष्य प्रकाश मार्ग सँ जाइत अछि से वापस नहि अबैत अछि, आ, जे मनुष्य अंधकार मार्ग सँ जाइत अछि से वापस लौट अबैत अछि । (२६)

भावार्थ : हे पृथापुत्र! भक्ति मे स्थित हमर कोनो भक्त एहि सब मार्ग केँ जनैत कहियो मोहग्रस्त नहि होइत अछि, ताहि हेतु हे अर्जुन! अहाँ हर समय हमर भक्ति मे स्थिर रहू । (२७)

भावार्थ : योग मे स्थित मनुष्य वेद सभक अध्यन सँ, यज्ञ सँ, तप सँ आर दान सँ प्राप्त सब पुण्य-फल सब केँ भोगैत अन्त मे निश्चित रूप सँ तत्व सँ जानिकय हमर परम-धाम टा केँ प्राप्त करैत अछि, जे कि हमर मूल निवास स्थान थिक । (२८)