९ मई २०२४ । मैथिली जिन्दाबाद!!
मैथिली सहित कुल ३ भाषा मे बनि रहल अछि फिल्म ‘लेबर’
मनोरंजन जगत मे मैथिली फिल्म सेहो नीक प्रदर्शन करब आरम्भ कय चुकल अछि। विगत १ दशक मे भारतीय राष्ट्रिय फिल्म पुरस्कार सँ अन्तर्राष्ट्रीय जगत् केर चर्चित फिल्म अवार्ड धरिक यात्रा कय चुकल मैथिली फिल्म केँ फेरो एकटा नया आशा-अपेक्षा जागल अछि। एहि बेर नेपाल सँ ई कार्य पूरा कय रहल छथि चर्चित फिल्म निर्देशक पूर्णेन्दु के. झा। हालहि मजदूर दिवस पर मजदूरहि केर विषय-सन्दर्भ पर आधारित फिल्म लेबर केर टिजर रिलीज भेल हँ। टिजर कुल ३ भाषा मे रिलीज कयल गेल अछि। मैथिली सँ आरम्भ भेल निर्माणगाथा आब नेपाली आ भोजपुरी धरि सेहो पहुँचि चुकल हँ। सामाजिक संजाल पर टिजर केँ नीक रिस्पौन्स सेहो भेटैत अभरल। एहि सन्दर्भ निर्देशक पूर्णेन्दु के. झा संग भेल संछिप्त बातचीत मे पता चलल जे पहिने मैथिली मात्र मे एकर निर्माण योजना छल, परञ्च नेपालक टौप फिल्मी पर्सनालिटिज संग-संग भोजपुरी समाजक अगुआ सभक राय आयल जे एकरा तीनू भाषा मे तैयार कयल जाय। तदनुसार ‘लेबर’ केर टिजर सेहो ३ भाषा मे आ सम्पूर्ण निर्माण कार्य व तैयारि तीनू भाषाक हिसाब सँ कय रहल छी।
मैथिली फिल्म प्रति मैथिली दर्शकक बदलैत स्वाद आ रुचि पर आधारित एक गोट प्रश्नक उत्तर मे पूर्णेन्दुजी कहलनि जे प्रोमिस त नहि कय सकैत छी, मुदा एस्योर करैत छी जे मैथिली मे रिलीज भेल हाल धरिक अनेकों चर्चित सिनेमा सभक तुलना मे ‘लेबर’ एकटा नव माइलस्टोन सिद्ध होयत।
एखन सोशल मीडिया मे जाहि तरहें जोर-शोर सँ ‘लेबर’ फिल्म पर चर्चा कयल जा रहल अछि, खास कय केँ भाषा-साहित्य एवं फिल्मकला आ रंगकर्म सँ जुड़ल एक सँ एक हस्ती सब एकर तैयारी आ कथा-वस्तु सब पर लिखि रहल छथि सेहो संकेत कय रहल अछि जे ई किछु विशेष अवश्य होयत। निर्देशक पूर्णेन्दु के. झा कहैत छथि जे पब्लिक मे एहि तरहक विशेष चर्चा सँ हमरा आर बेसी जिम्मेदारीक बोध भ’ रहल अछि। हम स्वयं बेसी कि बाजू, परञ्च तैयारी केर हर पक्ष केँ हम आनन्द लैत आगू बढ़ि रहल छी। मैथिली मीडिया आ सामाजिक अभियन्ता सब एहिना प्रोत्साहित करैत रहथि, हुनका लोकनिक सब जिज्ञासा केँ रिजल्ट सँ सिद्ध करबाक जिम्मेदारी हमर भेल।
‘लेबर’ केर कथा सम्पूर्ण नेपाली, मैथिली आ भोजपुरी समाज लेल सान्दर्भिक छैक। कारण नेपालदेशक सर्वाधिक आय ‘वैदेशिक रोजगार’ सँ यैह ‘लेबर’ सब अनैत छैक, तथापि लेबरक भाग्य मे ओकर बालबच्चाक भविष्य सँ लैत परिवारक प्रतिष्ठा आ सामाजिक मान्यता सब मे घोर समस्या – विभेद स्पष्ट छैक। एहेन अवस्था मे फिल्म मार्फत सरोकारवालाक ध्यानाकर्षण करायब अत्यन्त जरूरी छैक। निर्देशक झा तेँ पुख्ता दावा सहित कहलनि कि ई पहिल फिल्म थिकैक जेकर टिजर तीन भाषा मे प्रसारित कयल गेल अछि।
टिजर के चर्चा जहिना सकारात्मक आ सफल फिल्म रूप मे कयल गेल अछि, तहिना अन्तिम परिणाम सेहो सुखद होयत से प्रोमिस करैत छथि। आगू के तैयारी पूरे जोर-शोर सँ भ’ रहल छैक। कहलनि जे जल्दिये कास्टिंग-कौल हेतैक। नेपाल संग-संग भारतहु सँ एहि फिल्म लेल कलाकार सभक चयन कयल जायत। बाकी बात एखन निर्देशक बाजय सँ परहेज करैत फेर दर्शक दीर्घा केँ अपन काज सँ सन्तुष्ट करबाक वादा करैत छथि। कहैत छथि, बाकी सब बात फिल्म बतायत, हम नहि बाजय चाहि रहल छी। हम फिल्म प्रोडक्शन के प्रोसेस एन्जवाइ कय रहल छी। मैथिली जिन्दाबाद केर दर्शक सब धरि सेहो टिजर पहुँचैक आ हुनको सभक राय-सुझाव हमरा पास अबैत रहय, एतबा आग्रह।
‘लेबर’ फिल्म केर मैथिली भाषा मे टिजर केर लिंक निम्न अछिः
