शनि-रबि पाबनि – मिथिलाक विशेष पूजा पाठ

मिथिलामे स्त्रीगण अपन संतान तथा परिवारक सुख, समृद्धि एवम् मनोवांछित फल प्राप्तिक लेल मनाबैत छथि। ई पावनि छओ मास धरि चलैत अछि। छओ मासक समयावधिमे जतेको रबि पड़ैत छैक व्रती ओतेक दिन एकसंझा करैत छथि। किछु व्रती मासमे एकटा एकसंझा सेहो करैत छथि तथा बाँकी रबिके अनोना करैत छथि। पाबनिसँ एक दिन पूर्व पबनैतिन अरबा-अरबाईन खायत छथि। पुन: रबिदिन प्रात: उठि पबनैतिन स्नान कय केँ नीपल स्थान पर डालीमे ठकुआ, डाँट लागल पानक पात, सुपारी, मखान, फल-फूल, मधुर, केरा, बताशाक संग अरघौती बद्धी, आरतक पात आदि सजाय गोसाउनि अर्थात् भगबती केर पूजन-अर्चन कS नवका कपड़ासँ डाली झाँपि समीपक पोखरिक घाट पर जाएत छथि। व्रती स्त्रीगण जलमे ठाढ़ भS सूर्य भगवानकें डाली लS अर्घ्यदान करैत पोखरिमे डुबकी लगाय घाट पर पीढ़ीमे सेनुर लगाय कलश स्थापन करैत छथि। धूप-दीप, फूल, दूभि, अक्षत आ चाननसँ दिनकर भगवानकें पूजा कय बेराबेरी सब नैवेद्यक डालीकेँ उसगरैत छथि। तकरा बाद दिनकरकेँ हाथ जोड़ि प्रणाम करैत डाली सहित आँगन आबि जाएत छथि। डालीकेँ गोसाउनिक आगू राखि सपरिवार भगबतीकेँ (कुलदेवीकेँ) गोर लागि प्रसाद ग्रहण करैत छथि। तदोपरान्त डालीमे सँ आरतक पात लS ओकरा घरक मोंख पर साटि देल जाएत अछि। अगहन केर रबि-शनिकेँ पहिल अर्घ्य दिनसँ प्रारम्भ होमयवला ई पाबनि स्त्रीगणक लेल अति शुभ मानल जाएत अछि। प्रणम्य अछि मिथिलाक संस्कृति आ प्रणम्य छथि मैथिलानी नारीशक्ति। जय श्री हरि।