रामचरितमानस मोतीः श्री रामचन्द्र जीक अवतारक कारण

जखन-जखन धर्म केर ह्रास होइत अछि आर नीच अभिमानी राक्षस बढ़ि जाइत अछि और ओ सब एहेन अन्याय करैत अछि जेकर वर्णन नहि भ’ सकैछ, संगहि ब्राह्मण, गो, देवता और पृथ्वी कष्ट पबैत छथि, तखन-तखन ओ कृपानिधान प्रभु भाँति-भाँति केर (दिव्य) शरीर धारण कय सज्जन लोकनिक पीड़ा हरैत छथि। ओ असुर सब केँ मारिकय देवता लोकनि केँ स्थापित करैत छथि, अपन (श्वास रूप) वेदक मर्यादाक रक्षा करैत छथि आर जगत भरि मे अपन निर्मल यश केर प्रसार करैत छथि। श्री रामचन्द्रजी के अवतार केर यैह कारण थिक।

१०. याज्ञवल्क्यजी कहैत छथि – हे भरद्वाज! हम श्री रामचन्द्रजी केर गुणक कथा कहैत छी, अहाँ आदर सँ सुनू। तुलसीदासजी कहैत छथि – मान और मद केँ छोड़िकय आवागमन केँ नाश करयवला रघुनाथजी केँ भजू।

११. हिमालय पर्वत मे एकटा अत्यन्त पवित्र गुफा छल। ताहि के समीपहि सुन्दर गंगाजी बहैत छलीह। ओ परम पवित्र सुन्दर आश्रम देखलापर नारदजीक मोन केँ बहुते सोहाओन लगलनि। पर्वत, नदी और वन केर (सुन्दर) विभाग सब देखिकय नादरजी केँ लक्ष्मीकांत भगवान केर चरण मे प्रेमक भाव आबि गेलनि। भगवान केँ स्मरण करिते नारद मुनि केँ दक्ष प्रजापतिक देल ओ श्राप जाहि के कारण ओ कोनो स्थान पर बेसीकाल रुकि नहि सकैत छलाह, ताहि श्रापक गति रुकि गेलनि आर मोन स्वाभाविकहि निर्मल भेला सँ हुनका समाधि लागि गेलनि। नारद मुनि केर ई तपोमयी स्थिति देखिकय देवराज इन्द्र डरा गेलाह। ओ कामदेव केँ बजाकय हुनकर खूब आदर-सत्कार कय केँ कहलखिन जे हमर हित वास्ते अहाँ अपन सहायक सहित नारदजीक समाधि केँ भंग करय जाउ। ई सुनि मीनध्वजधारी कामदेव मोन मे प्रसन्न भ’ कय चललाह। इन्द्र केर मोन मे ई डर भेलनि जे देवर्षि नारद हमर पुरी अमरावतीक निवास (राज्य) चाहैत छथि। जग भरि मे जे कामी आ लोभी होइत अछि, ओ कुटिल कौआ जेकाँ सब सँ डेराइत अछि। जेना मूर्ख कुत्ता सिंह केँ देखिकय सूखल हड्डी लयकय भागय आर ओ मूर्ख ई बुझय जे कतहु ओ हड्डी केँ सिंह छीनि नहि लियए, तहिना इन्द्र केँ (नारदजी हमर राज्य छीनि लेता, एहेन सोचैत) लाज तक नहि भेलनि। जखन कामदेव ओहि आश्रम मे गेलाह तखन ओ अपन माया सँ ओतय वसन्त ऋतु केँ उत्पन्न कयलनि। तरह-तरह के गाछ आ ताहि पर रंग-बिरंगक फूल फुला गेल, ओहि पर कोयली कूकय लागल आ भँवरा सेहो गुंजार करय लागल। कामाग्नि भड़काबयवला तीन तरहक सोहाओन हवा (शीतल, मंद और सुगंध) चलय लागल। रम्भा आदि नवयुवती देवांगना लोकनि जे सब कामकला मे निपुण छलीह, ओ लोकनि बहुतो प्रकारक तान केर तरंगक संग गाबय लगलीह आर हाथ मे गेंद लय कय नाना प्रकारक खेल खेलाय लगलीह। कामदेव अपन एहि सहायक सबकेँ देखिकय खूब प्रसन्न भेलथि आर फेर ओ नाना प्रकारक मायाजाल पसारि देलथि। लेकिन कामदेव केर कोनो कला मुनि पर असर नहि कय सकल। तखन त पापी कामदेव अपनहि नाश केर भय सँ भयभीत भ’ गेलाह। लक्ष्मीपति भगवान जेकर रक्षक होइथ, भले, ओकर सीमा (मर्यादा) केँ कियो दबा सकैत अछि की? तखन अपन सहायक समेत कामदेव बहुते डेराकय अपन मोन मे हारि मानिकय अत्यन्त दीनभाव (आर्त) स्वर मे मुनिक चरण पकड़ि लेलनि। नारदजीक मोन मे कनिकबो क्रोध नहि एलनि। ओ प्रिय वचन कहिकय कामदेव केँ बुझौलनि। तखन मुनिक चरण मे सिर नमाकय हुनकर आज्ञा पाबि कामदेव अपन सहायक लोकनि सहित लौटि गेलाह। देवराज इन्द्र केर सभा मे जाकय ओ मुनिक सुशीलता और अपन करतूत सब कहलखिन जे सुनिकय सभक मोन मे बड़ा आश्चर्य भेलनि आर मुनिक बड़ाई कय केँ सब कियो श्री हरि केँ प्रणाम कयलनि। तखन नारदजी शिवजी लग गेलाह। हुनका मोन मे एहि बातक अहंकार भ’ गेलनि जे हम कामदेव केँ जीति लेलहुँ। ओ कामदेवक सारा चरित्र शिवजी केँ सुनेलनि आ महादेवजी हुनका अत्यन्त प्रिय जानिकय एहि तरहें एक महत्वपूर्ण शिक्षा देलखिन – हे मुनि! हम अहाँ सँ बेर-बेर विनती करैत छी जे जेना ई कथा अहाँ हमरा सुनेलहुँ, तेना भगवान श्री हरि केँ कथमपि नहि सुनायब। जँ चर्चो चलय तँ एकरा नुका लेब।