रामचरितमानस मोतीः शिव-पार्वती संवाद

रामचरितमानस मोती

शिव-पार्वती संवाद

चर्चा चलि रहल छल शिव-पार्वती विवाह उपरान्त कैलाश पहुँचबाक आ एकटा अति विशिष्ट बरगद केर गाछ केर नीचाँ शिवजीक आगमन हेबाक। एकर बाद –

१. शिवजीक स्वरूप केर वर्णनः हुनकर माथपर जटाक मुकुट आ गंगाजी शोभायमान रहथि। कमल समान पैघ-पैघ आँखि छलन्हि। नील कंठ सहित शिव सुन्दरताक भंडार रहथि। हुनक मस्तक पर द्वितीया के चन्द्रमा शोभित छल। कामदेव केर शत्रु शिवजी ओतय बैसल एना शोभित भ’ रहल छलाह जेना शांतरस स्वयं शरीर धारण कएने बैसल हो। बढियाँ मौका पाबि शिवपत्नी माता पार्वतीजी हुनका लग अयलीह। अपन प्रिय पत्नी केँ शिवजी खूब आदर-सत्कार कयलनि आर अपन बाम भाग मे बैसय लेल आसन देलनि। पार्वतीजी प्रसन्न भ’ कय शिवजी लग बैसि रहलीह। हुनका पैछला जन्म केर कथाक स्मरण आबि गेलनि। स्वामीक हृदय मे अपना उपर पहिनेक अपेक्षा अधिक प्रेम बुझि पार्वतीजी हँसिकय प्रिय वचन बजलीह। याज्ञवल्क्यजी कहैत छथि – जे कथा सभक हित करयवला अछि, वैह पार्वतीजी पुछय चाहि रहल छथि। पार्वतीजी पुछलखिन, “हे संसार के स्वामी! हे हमर नाथ! हे त्रिपुरासुर केर वध करनिहार! अपनेक महिमा तीनू लोक मे विख्यात अछि। चर, अचर, नाग, मनुष्य और देवता सब अहाँक चरणकमल केर सेवा करैत अछि। हे प्रभो! अहाँ समर्थ, सर्वज्ञ और कल्याणस्वरूप छी। सब कला और गुण केर निधान छी और योग, ज्ञान तथा वैराग्य के भंडार छी। अहाँक नाम शरणागतक लेल कल्पवृक्ष अछि। हे सुख के राशि ! यदि अहाँ हमरा उपर प्रसन्न छी और सचमुच हमरा अपन दासी मानैत छी, त हे प्रभो! अहाँ श्री रघुनाथजी की नाना प्रकारक कथा कहिकय हमर अज्ञानता केँ दूर करू। जेकर घर कल्पवृक्ष केर नीचा हो, ओ भला दरिद्रता सँ उत्पन्न दुःख केँ कियैक सहत? हे शशिभूषण! हे नाथ! हृदय मे एना विचार कय हमर बुद्धि केर भारी भ्रम केँ दूर करू। हे प्रभो! जे परमार्थतत्व (ब्रह्म) केर ज्ञाता और वक्ता मुनि छथि, ओ श्री रामचन्द्रजी केँ अनादि ब्रह्म कहैत छथि और शेष, सरस्वती, वेद और पुराण सब कियो श्री रघुनाथजी केर गुण गबैत छथि। और हे कामदेव केर शत्रु! अपने सेहो दिन-राति आदरपूर्वक राम-राम जपल करैत छी – ई राम वैह अयोध्याक राजाक पुत्र छथि? या अजन्मा, निर्गुण और अगोचर कियो आर राम छथि? जँ ओ राजपुत्र छथि त ब्रह्म केना? और यदि ब्रह्म छथि त स्त्रीक विरह मे हुनकर मति बावली कोना भ’ गेलनि? एम्हर हुनकर एहेन देखिकय आर ओम्हर हुनकर महिमा सुनिकय हमर बुद्धि एकदम चकरा रहल अछि। यदि इच्छारहित, व्यापक, समर्थ ब्रह्म कियो आर छथि त हे नाथ! हमरा ओ सब बुझाकय कहू। हमरा नादान बुझि मोन मे क्रोन नहि आनू। जाहि सँ हमर मोह दूर हुए, वैह करू। हम पिछला जन्म मे वन मे श्री रामचन्द्रजीक प्रभुता देखने रही, लेकिन बहुत भयभीत भ’ जेबाक हम ओ बात अहाँ केँ नहि सुनेलहुँ। तैयो हमर मलिन मोन केँ ई बोध नहि भेल। ओकर फल सेहो हम नीक जेकाँ पाबि गेलहुँ। एखनहुँ हमर मोन मे किछु सन्देह अछि। अहाँ कृपा करू, हम हाथ जोड़िकय विनती करैत छी। हे प्रभो! अपने ताहि समय हमरा बहुतो प्रकार सँ बुझेने रही, तैयो हमर सन्देह नहि गेल। हे नाथ! ई सोचिकय हमरा पर क्रोन नहि करू। हमरा आब पहिने जेकाँ मोह नहि अछि, आब त हमर मोन मे रामकथा सुनबाक रुचि जागि गेल अछि। हे शेषनाग केँ अलंकार रूप मे धारण करनिहार देवता सभक नाथ! अपने श्री रामचन्द्रजी के गुण केर पवित्र कथा कहू।हम पृथ्वी पर माथ टेकिकय अपनेक चरणक वन्दना करैत छी आर हाथ जोड़िकय विनती करैत छी। अहाँ वेदक सिद्धान्त केँ निचोड़िकय श्री रघुनाथजी केर निर्मल यश वर्णन करू। यद्यपि स्त्री होयबाक कारण हम ओ सब सुनबाक अधिकारिणी नहि छी, तैयो हम मन, वचन और कर्म सँ अपनेक दासी छी। संत लोक जतय आर्त अधिकारी पबैत छथि, ओतय गूढ़ तत्त्व सेहो ओकरा सँ नहि नुकबैत छथि। हे देवता लोकनिक स्वामी! हम अत्यन्त आर्तभाव (दीनता) सँ पुछैत छी, अपने हमरा पर दया कयकेँ श्री रघुनाथजीक कथा कहू। पहिने त ओ कारण विचारिकय बताउ जाहि सँ निर्गुण ब्रह्म सगुण रूप धारण करैत छथि। फेर हे प्रभु! श्री रामचन्द्रजीक अवतार (जन्म) केर कथा कहू तथा हुनक उदार बाल चरित्र कहू। फेर जाहि प्रकार ओ श्री जानकीजी सँ विवाह कयलनि, ओहो कथा कहू आर फेर ई बताउ जे ओ जे राज्य छोड़लनि से कोन दोष सँ। हे नाथ! फेर ओ वन मे रहिकय जे अपार चरित्र कयलनि तथा जाहि तरहें रावण केँ मारलनि, से कहू। हे सुखस्वरूप शंकर! फेर अहाँ ओ सब लीला के बारे मे कहू जे ओ राज्य (सिंहासन) पर बैसिकय कएने रहथि। हे कृपाधाम! फेर ओ अद्भुत चरित्र कहू जे श्री रामचन्द्रजी कयलनि – ओ रघुकुल शिरोमणि प्रजा सहित कोन प्रकारे अपन धाम केँ गेलाह? हे प्रभु! फेर अपने ओ तत्त्व केँ बुझाकय कहू जेकर अनुभूति मे ज्ञानी मुनिगण सदा मग्न रहैत छथि आर फेर भक्ति, ज्ञान, विज्ञान और वैराग्य केर विभाग सहित वर्णन करू। एकर अलावे श्री रामचन्द्रजी के औरो जे विभिन्न रहस्य (छिपल भाव अथवा चरित्र) सब अछि, सेहो कहू। हे नाथ! अपनेक ज्ञान अत्यन्त निर्मल अछि। हे प्रभो! जे बात हम नहियो पुछि पेलहुँ, हे दयालु! ओहो सब अपने नहि नुकायब। वेद अपने केँ तीनू लोकक गुरु कहलक अछि। दोसर पामर जीव एहि रहस्य केँ कि जानय गेल!

२. पार्वतीजीक सहज सुन्दर और छलरहित (सरल) प्रश्न सुनिकय शिवजी केँ बहुत नीक लगलन्हि। श्री महादेवजीक हृदय मे सारा रामचरित्र आबि गेलनि। प्रेम सँ हुनकर शरीर पुलकित भ’ गेलनि आर नेत्र मे जल भरि गेलनि। श्री रघुनाथजीक रूप हुनकर हृदय मे आबि गेलनि जाहि सँ स्वयं परमानन्दस्वरूप शिवजी सेहो अपार सुख पेलनि। शिवजी दू घड़ी धरि ध्यान केर रस (आनंद) मे डूबल रहला, फेर ओ मोन केँ बाहर खींचलनि आर तखन ओ प्रसन्न भ’ कय श्री रघुनाथजीक चरित्र वर्णन करय लगलाह।

२८. हे पार्वती! वैह परमात्मा श्री रामचन्द्रजी छथि। हुनका मे भ्रम (देखय मे अबैत) अछि, अहाँक एना कहनाय अत्यन्त अनुचित अछि। एहि तरहक सन्देह मोन मे अनिते देरी मनुष्य केर ज्ञान, वैराग्य आदि सारा सद्गुण नष्ट भ’ जाइत छैक।

२९. शिवजीक भ्रमनाशक वचन केँ सुनिकय पार्वतीजी केर सब कुतर्कक रचना मेटा गेलनि। श्री रघुनाथजी केर चरण मे हुनकर प्रेम और विश्वास भ’ गेलनि आर कठिन असम्भावना (जेकर होयब सम्भव नहि, एहेन मिथ्या कल्पना) भागि गेलनि। बेर-बेर स्वामी (शिवजी)क चरणकमल केँ पकड़िकय और अपन कमल समान हाथ केँ जोड़िकय पार्वतीजी मानू प्रेमरस मे सराबोर सुन्दर वचन बजलीह – अपनेक चन्द्रमाक किरणक समान शीतल वाणी सुनिकय हमर अज्ञान रूपी शरद-ऋतु केर रौउदक भारी ताप मेटा गेल। हे कृपालु! अपने हमर सारा सन्देह केँ हरि लेलहुँ, आब श्री रामचन्द्रजीक यथार्थ स्वरूप हमरा बुझय मे आबि गेल। हे नाथ! अहाँक कृपा सँ आब हमर विषाद चलि गेल आर अहाँक चरणक अनुग्रह सँ हम सुखी भ’ गेलहुँ। हालांकि हम स्त्री होयबाक कारण स्वभावहि सँ मूर्ख आर ज्ञानहीन छी, तैयो आब अहाँ हमरा अपन दासी जानिकय, हे प्रभो! जँ अहाँ हमरा पर प्रसन्न छी त जे बात हम पहिने अहाँ सँ पुछने रही सेहो कहू। ई सत्य छैक जे श्री रामचन्द्र जी ब्रह्म थिकाह, चिन्मय (ज्ञानस्वरूप) छथि, अविनाशी छथि, सबसँ रहित और सबके हृदय रूपी नगरी मे निवास करनिहार छथि, तखन हे नाथ! ओ मनुष्य केर शरीर कोन कारण सँ धारण कयलनि? हे धर्म केर ध्वजा धारण करनिहार प्रभो! ई हमरा बुझाकय कहू।

३०. पार्वतीक अत्यन्त नम्र वचन सुनिकय और श्री रामचन्द्रजी केर कथा मे हुनकर विशुद्ध प्रेम देखिकय कामदेव केर शत्रु, स्वाभाविकहि सुजान, कृपा निधान शिवजी मन मे बहुत हर्षित भेलाह और बहुतो प्रकार से पार्वतीक बड़ाई कयकेँ फेर बजलाह –

क्रमशः….

हरिः हरः!!