रामचरितमानस मोतीः शिवजीक विवाह

हे नाथ! ई उमा हमरा अपन प्राणक समान प्रिय अछि। अहाँ एकरा अपन घरक टहलनी बनायब आ एकर सब अपराध केँ क्षमा करैत रहब। आब प्रसन्न भ’ हमरा यैह वर दिअ। शिवजी हुनको खूब नीक जेकाँ बुझबैत सन्तोष देलनि। तखन ओ शिवजीक चरण मे माथ नमाकय घर गेलीह। पार्वती केँ बजाकय अपन कोरा मे बैसाकय हुनका सुन्दर सीख दियए लगलीह –

५. मैना फेरो स्वयं केँ सम्हारैत बेटीक विदाई सँ पहिने हुनका नारीधर्म बुझबैत बजलीह – विधाता जगत मे स्त्री जाति केँ कियैक जन्म देलनि? पराधीन केँ सपनहु मे सुख नहि भेटैछ। एतेक कहिते माता प्रेम मे अत्यन्त विकल भ’ गेलीह, मुदा कुसमय जानिकय दुःख करबाक अवसर नहि बुझि अपना केँ धीरज देलीह। ओ बेर-बेर बेटी सँ गला मिलबैत छथि आ फेर हुनकर पैर पकड़य लेल नीचाँ झुकि जाइत छथि। अद्भुत प्रेम अछि जेकर किछुओ वर्णन नहि कयल जा सकैत अछि। भवानी सब स्त्रिलोकनि सँ भेटिकय फेर अपन माय केर हृदय सँ लिपटि गेलीह। 

६. हिमवान्‌ अत्यन्त प्रेम सँ शिवजी केँ अरियातय लेल संगे चललाह। वृषकेतु (शिवजी) हुनका बहुतो तरह सँ संतोष दयकय वापस कयलथि। पर्वतराज हिमाचल तुरंत घर आबि गेलाह आर ओ सब पर्वत ओ सरोवर सब केँ बजौलनि। हिमवान आदर, दान, विनय और बहुत सम्मानपूर्वक सभक विदाई कयलथि। 

१०. शिवजीक रसीला और सुहाओन चरित्र केँ सुनिकय मुनि भरद्वाजजी सेहो खूब प्रसन्न भेलाह, सुख प्राप्त कयलथि। कथा सुनबाक हुनकर लालसा आर बेसी बढ़ि गेलनि। आँखि मे नोर भरि गेलनि आ रोमावली पुलकित (रोइयाँ ठाढ़) भ’ गेलनि। ओ प्रेम मे मुग्ध भ’ गेलाह। मुंह सँ बोल नहि निकलैत अछि। हुनकर ई दशा देखिकय ज्ञानी मुनि याज्ञवल्क्य बहुत प्रसन्न भेलाह आ कहलखिन – हे मुनीश! अहा हा! अहाँक जन्म धन्य अछि, अहाँ केँ गौरीपति शिवजी प्राणक समान प्रिय छथि। शिवजीक चरण कमल मे जिनकर प्रीति नहि अछि ओ श्री रामचन्द्रजी केँ सपनो मे नीक नहि लगैत अछि। विश्वनाथ श्री शिवजी केर चरण मे निष्कपट (विशुद्ध) प्रेम होयब यैह रामभक्त केर लक्षण थिक। शिवजीक समान रघुनाथजी (केर भक्ति) केर व्रत धारण करयवला के अछि? जे बिना कोनो पाप के सती जेहेन स्त्री केँ त्यागि देलाह आर प्रतिज्ञा कयकेँ श्री रघुनाथजीक भक्ति केँ देखा देलनि (सिद्ध कय देलनि)। हे भाई! श्री रामचन्द्रजी केँ शिवजीक समान आर के प्रिय भ’ सकैत अछि? हम पहिने शिवजीक चरित्र कहिकय अहाँक भेद बुझि लेलहुँ। अहाँ श्री रामचन्द्रजीक पवित्र सेवक छी आर सब दोष सँ रहित छी। हम अहाँक गुण और शील जानि लेलहुँ। आब हम श्री रघुनाथजीक लीला कहैत छी, सुनू। हे मुनि! सुनू, आइ अहाँक भेटला सँ हमर मोन मे जे आनंद भेल अछि ओ कहल नहि जा सकैत अछि। हे मुनीश्वर! रामचरित्र अत्यन्त अपार अछि। सौ करोड़ शेषजी सेहो ओकरा पूरा नहि कहि सकैत छथि। तथापि हम जेहेन सुनलहुँ अछि, ओहेन वाणीक स्वामी (प्रेरक) और हाथ मे धनुष लेने प्रभु श्री रामचन्द्रजी केँ स्मरण कयकेँ कहैत छी। सरस्वतीजी कठपुतली समान छथि आर अन्तर्यामी स्वामी श्री रामचन्द्रजी (ताग पकड़िकय कठपुतली केँ नचबयवला) सूत्रधार छथि। अपन भक्त जानिकय जाहि कवि पर ओ कृपा करैत छथि ओकर हृदय रूपी आँगन मे सरस्वती केँ ओ नचायल करैत छथि। वैह कृपालु श्री रघुनाथजी केँ हम प्रणाम करैत छी आर हुनकहि निर्मल गुण सभक कथा कहैत छी।

११. कैलाश पर्वत मे श्रेष्ठ और बहुते रमणीय अछि, जतय शिव-पार्वतीजी सदा निवास करैत छथि। सिद्ध, तपस्वी, योगीगण, देवता, किन्नर और मुनि सभक समूह ओहि पर्वत पर रहैत छथि। ओ सब बड़ा पुण्यात्मा छथि और आनंदकन्द श्री महादेवजीक सेवा करैत छथि। जे भगवान विष्णु और महादेवजी सँ विमुख अछि आर जेकरा धर्म मे प्रीति नहि छैक ओ लोक सपनहुँ मे ओतय नहि जा सकैत अछि। ओहि पर्वत पर एक विशाल बरगद केर पेड़ अछि, जे नित्य नवीन और सब काल (छहो ऋतु) मे सुन्दर रहैत अछि। ओतय तीनू प्रकारक (शीतल, मंद और सुगंध) वायु बहैत रहैत अछि और ओकर छाहरि बड़ा ठंढा रहैत अछि। ओ शिवजीक विश्राम करबाक वृक्ष थिक, जेकरा वेद गान कएने अछि।

१२. एक बेर प्रभु श्री शिवजी ओहि वृक्ष केर नीचाँ गेलाह आर ओ देखिकय हुनकर हृदय मे बहुत आनंद भेलनि। अपना हाथ सँ बाघम्बर बिछाकय कृपालु शिवजी स्वभावहि सँ बिना कोनो खास प्रयोजनक ओतय बैसि गेलाह। कुंद केर पुष्प, चन्द्रमा और शंख केर समान हुनकर गौर शरीर छलन्हि। बड़का टा के हाथ आर ओ मुनि सब जेकाँ वल्कल वस्त्र धारण कएने रहथि। हुनकर चरण नब (पूर्ण रूप सँ फुलायल) लाल कमल केर समान छल, नहक ज्योति भक्त केर हृदयक अंधकार हरण करयवला छल। साँप और भस्म – यैह हुनकर भूषण छल आर ओहि त्रिपुरासुर केर शत्रु शिवजीक मुख शरद (पूर्णिमा) केर चन्द्रमा वला शोभा केँ सेहो हरयवला (फीका करयवला) छल।