‘हम’ सफल होइ, ‘हम’ हर क्षेत्र मे नीक करी, ‘हम’ केकरो सँ आगू रही…. ई तीनू अवस्था जनसामान्य केर मनक भीतर होइते टा छैक। हँ, तेहने भुश्कोल छात्र रहत जे पहिने सँ हाथ-पैर चियारि देत, मुंह बाबि देत आ बकार हरण भ’ जेतैक तखन ओ ई सब भावना नहियो आनय से सम्भव अछि। जनसामान्य केर मन-मस्तिष्क मे सफलता प्राप्ति प्रमुख लक्ष्य होइत छैक। सब कियो एहि लेल प्रयत्नशील रहिते टा अछि। जेना-जेना जीवन आगू बढैत जाइत छैक तेना-तेना ई ‘हम एना…’, ‘हम ओना…’, ‘हम केना…’, ‘हमर ई….’, ‘हमर ओ….’, ‘हमहीं पहिने तखन कियो’… ई भावना खतरनाक रूप सँ बढैत चलि जाइत छैक बहुतो लोक मे। कतहु हम पढ़ने रही जे ई अति महात्वाकांक्षाक कारण मनुष्यक मानसिकता मे आत्मकेन्द्रित रहबाक बात आ अपना आगू दोसरक अस्तित्व केँ गौण कय देबाक या जानि बुझिकय नकारि देबाक अवस्था आबि गेल करैत छैक।