एहेन मृत्यु सँ शिक्षा लेब जरूरी
स्वीडन के कलाकार ‘लार्स विल्क्स’ जे इस्लामक पैगम्बर मोहम्मद साहेब पर आधारित निन्दित कार्टून बनेने छलाह से आइ एक सड़क दुर्घटना मे मारल गेलाह। दुर्घटना कोनो अन्य कारण सँ नहि बल्कि जाहि पुलिस सुरक्षा सहितक गाड़ी मे ओ यात्रा कय रहल छलाह से स्वयं अनियंत्रित होइत एकटा ट्रक सँ टकराइत सड़कक दोसर भाग मे जाय आगि लागि गेला सँ, बचेबाक प्रयास करितो कलाकार विल्क्स सहित अन्य दुइ पुलिस सहितक मृत्यु भऽ गेलैक। शुरुआती जाँच मे एहि हादसा मे कोनो तरहक साजिश वगैरह केर बात नहि अभरलैक अछि। श्री विल्क्स चूँकि कड़ा पुलिस सुरक्षा मे रहल करथि, हुनका पर एक लाख डलर सहितक इनाम राखि जान लेबाक धमकी अल कायदा द्वारा जारी कयल गेल छलैक, एहि सँ पूर्व ओ सहभागी एक सार्वजनिक विमर्शक कार्यक्रम मे गोलीबारी सेहो भेल छलैक, तेँ आजुक पुलिस सुरक्षा मे पुलिस वैन मे यात्रा करबाक समय मे आखिरकार विल्क्स केर अस्वाभाविक मृत्यु भेलनि से मनन योग्य विषय भेल। एखनहि सविस्तार सब समाचार बीबीसी पर पढलहुँ आ हमरा मन मे जे प्रतिक्रिया आयल से ट्विट कयलहुँ –
“केकरो धर्मक विरूद्ध हास्य-विनोद करब हमरा नजरि मे सही मानवता नहि थिक। आलोचना तर्कक आधार पर करब या नास्तिकता धारण करब ओहि सँ बरु नीक छैक, लेकिन केकरो धार्मिक आस्थाक विरूद्ध चोटिल करयवला अभिव्यक्ति… एहि तरहक स्वतंत्रता कदापि स्वीकार्य नहि। लार्स विल्क्स केर दुखद मृत्यु सँ शिक्षा!”
हम अपन समस्त परिचित स्वजन-परिजन सँ आ हमर अपन हजारों अनुगामी-अनुशरणकर्ता सँ करबद्ध प्रार्थना करब जे केकरो धर्म आ ओहि धर्मक महापुरुष प्रति सदिखन श्रद्धाक भाव राखू, कदापि केकरो प्रति गलत विचार मन मे नहि एबाक चाही। आ जँ एहेन कुविचार केकरो मोन मे अबैत अछि आ एकरा अभिव्यक्तिक स्वतंत्रता कहल जाइछ, जे दोसर कतेको लोक लेल आहतकारी अछि त निश्चित एकर गलत प्रारब्ध निर्माण होय, एकर भोग गलते भेटत। ॐ तत्सत्!!
विल्क्स केर कलाकारिता केँ नमन आ श्रद्धाञ्जलि! ईश्वर सद्गति प्रदान करथि!!
हरिः हरः!!
