तिलदान

(दोसर क्रमशः सँ आगाँ)

मातृऋण सँ मुक्तिक लेल तिलदान

पुराण मे कहल गेल अछि जे माता केर पुत्र पर महान ऋण होइत छैक। ओहि ऋण केर निवृत्ति तँ कोनो तरहें संभव नहि छैक, तैयो अपन कर्तव्य केर दृष्टि सँ मात्र मातृऋण सँ उऋण हेबाक लेल कांस्यपात्र मे तिल भरिकय दक्षिणा सहित दान कयल जाइत अछि। एहि मे हवन, मातृश्राद्ध आदि करबाक सेहो विधान अछि। सौभाग्यवती स्त्री लोकनि केँ वस्त्र, आभूषण, आदि सेहो देल जाइत छैक। ब्राह्मण भोजन होइत छैक। एकर विधि मे कहल गेल अछि जे माघी पूर्णिमा, सुर्य चन्द्र ग्रहण, संक्रान्ति तिथि, युगादि तिथि अथवा निर्दिष्ट पुण्यकालक दिन नित्यक्रिया सम्पन्न कय द्वादशकमलदल केर ऊपर तिलपूर्ण कांस्यपात्र केँ स्थापित कय विष्णु भगवान् केर पूजन कय अग्नि मे विष्णुमंत्र सँ अष्टोत्तरशताहुति घृताक तिल सँ दी और दानग्रहीता ब्राह्मण केँ उत्तरमुख बैसाकय पादप्रक्षालन आदि कय केँ मातृश्राद्ध सम्पन्न करी; तदनन्तर पवित्र भऽ कय संकल्पपूर्वक सुवर्ण सहित तिलपूर्ण कांस्यपात्र ब्राह्मण केँ दान करी। ओहि समय ब्राह्मण केँ उद्देश्य कय निम्न मंत्र केँ पढी –

कांस्यपात्रं मया दत्तं मातुरानृण्यकाम्यया।

भगवन् वचनातुभ्यं यथाशक्ति तथा वद॥

दशमासाश्च उदरे जनन्याः संस्थितस्य मे।

क्लेशिता बालभावेन स्तनपानाद्‌द्विजोत्तम॥

मलमूत्रादिमल्लेपलिप्ता या च कृता मया।

भवतो वचनादद्य मम मुक्तिर्भवेदृणात्॥

तिलसंख्याकृतं दुःखं जनन्या मम सेवितम्।

कांस्यपात्रप्रदानेन कृतकृत्यो भवाम्यहम्॥

मंत्र केेर भाव ई अछि जे हे भगवान्! माताक ऋण सँ मुक्त हेबाक अभिलाषा सँ हम यथाशक्ति ई तिलपूर्ण कांस्यपात्र अपने केँ प्रदान कयलहुँ अछि। एकर जे फल हुए से बतेबाक कृपा करू। हम दस मास धरि माय केर गर्भ मे रहलहुँ, ताहि समय हम माय केँ महान् कष्ट पहुँचेलहुँ, हे द्विजोत्तम, फेर जन्मक समय तथा बालकपन मे स्तनपान आदि सँ हुनका दुःखे देलहुँ। हम हुनका अपन मल-मूत्रादि सँ लिप्त कयलहुँ। हम जे माय केँ कष्ट देलहुँ ताहि सँ हमर मुक्ति अपने ब्राह्मणक वचन सँ भऽ जाय। हम जे ई तिल देलहुँ अछि ताहि संख्या मे बल्कि ताहू सँ बेसी दुःख माय केँ देने छी, आर माय एहि तिल संख्या सँ सेहो बेसी दुःख हमरा लेल सहन कयलीह अछि। अतः एहि तिलपूरित कांस्यपात्रक दान सँ हम कृतकृत्य भऽ जाय – एहेन अपने हमरा ऊपर कृपा करी। एना कहिकय संकल्पसहित ओ सोपस्कर तिलपूर्ण कांस्यपात्र ब्राह्मण केँ दान कय दी। दान लय केँ दानग्रहीता ब्राह्मण कहथि – ‘त्वयैतत्कृततिलपूर्णकांस्यपात्रदानेन जननी-संभवादृणात्त्वं मुक्तो भवेत्’ अर्थात् एहि तिलपूर्ण कांस्यपात्र केर दान सँ अहाँ मातृऋण सँ उऋण भऽ जाउ।

तदनन्तर व्याहृति सब सँ आज्यहोम कय केँ विसर्जन करी तथा ब्राह्मणभोजन कराबी।

एहि तरहें माघमास केर पूर्णिमा केँ माताक निमित्त जे किछुओ देल जाइत अछि से अक्षय भऽ जाइत अछि – एहेन बात भगवान् शंकर केर कहब छन्हि।

तथान्यदपि यद्दतं माघ्यामुद्दिश्य मातरम्।

तदक्षय्यफलं सर्वं पुरा प्राह महेश्वरः॥

एहि तरहें तिल केर दानक बड पैघ महिमा छैक। जप, तप, अनुष्ठानादि सत्कर्म मे विकलता आदि दोष सभक निवृत्तिक लेल सेहो कर्मसमाप्तिक अनन्तर अच्छिद्रदान होइत छैक जाहि मे तिल केर दान कयल जाइछ, जाहि सँ कर्मक वैकल्य पूर्ण भऽ जाइत छैक।

ॐ तत्सत्!