कोन मैथिली लेखक-साहित्यकार कतेक पढल जाइत छथि – एक छोट सर्वे

१७ मई २०२१ – मैथिली जिन्दाबाद!!

मैथिली भाषाक साहित्य आ एकर इतिहास सुदृढ आ सम्पन्न रहितो वर्तमान पीढी धरि अबैत-अबैत एकर पठनीयता पर बड पैघ संकट अछि। विद्यालय, महाविद्यालय आ उच्च शिक्षा धरि मैथिली स्थापित रहितो कतेक लोकक पसीन या प्राथमिकता मे मैथिली अध्ययन पड़ैत अछि ताहि पर सेहो दुविधाजनक स्थिति कहय-सुनय लेल भेटि जाइत अछि। जखन कि मैथिली पढाई केर महत्व उच्च किसिमक सरकारी नौकरी (सेवा आयोग केर परीक्षा, विद्यालय शिक्षक, महाविद्यालय प्राध्यापक, अनुवादक) आदिक संग कतेको तरहक निजी संस्थान मे सेहो एकर काफी महत्व अछि। स्वरोजगारक क्षेत्र मे त एतेक पैघ मैदान खाली अछि जे जेकरा जतेक मोन हो से ओतेक दौड़ लगाकय अपना सुस्थापित आ प्रतिष्ठित बना सकैत अछि। तथापि मैथिली साहित्यक पठनीयता सँ नैराश्यताक भाव चिन्ताजनक अछि। मैथिलीभाषी जनमानस मे स्वत्व प्रति एहेन विकर्षण आबयवला किछु दशक बाद मिथिला केँ श्रुति इतिहास मे धकेलि सकैत अछि, एहेन आशंका उपस्थित भऽ रहल अछि। मंचीय प्रस्तुति आ आम उत्सव सब मे साहित्यक पुरोधा एक विद्यापति टा केँ बेसी देखल-सुनल जाइत छन्हि, ताहि सँ सेहो कतेको लोकक मोन मे ई दुविधा होइत छन्हि जे बाकी सृजनकर्ताक परिचिति आखिर आम जनमानस मे कियैक नहि बनल। यैह सब सन्दर्भ पर फेसबुक केर ‘दहेज मुक्त मिथिला’ नाम्ना समूह पर एकटा छोट सर्वे कयल गेल। विदित हो जे एहि समूह पर काफी जानल-मानल विद्वान्-विदुषी लोकनि उपलब्ध छथि। जिनका अपने गुमाने चूर होयबाक अभिमान छन्हि ओ सब विरले कहियो सक्रिय होइत छथिन, मुदा जनसामान्य केर नीक सक्रियता देखल जाइछ आर विमर्शक स्तर सेहो काफी उच्च आ समय-सान्दर्भिक रहैत अछि। तेँ, एक सजग-जागरूक फेसबुक समूह पर एहि तरहक सर्वे सँ मैथिलीक पठनीयता पर एकटा समीक्षात्मक अवस्था बनल से कहि सकैत छी। एखन धरि लगभग २०० गोटे अपन विचार रखलनि अछि आर बहुत रास मैथिली साहित्यकार सभक नाम, हुनक कृतित्व आदिक नीक व्योरा आबि सकल अछि। एहि पर आधारित एक गोट वेबिनार सेहो काल्हि राति ९ बजे सँ ११ बजेक समय मे आयोजित भेल जाहि मे विदुषी रेखा झा, अखिलेश कुमार मिश्र, राकेश कुमार झा ‘रसिक’, ईशनाथ झा, अजित आजाद एवं नवीन झा जेहेन जानल-मानल लेखक-विद्वान् व शिक्षाविद् लोकनि अपन विचार रखलनि। आउ, सीधे देखी जे एहि सर्वे मे किनकर कि विचार आयल अछिः