एन्टा अमेरिका द्वारा सफल वेबिनार (पूर्ण प्रतिवेदन) – मैथिली केर वर्तमान अवस्था आ जनगणना-२०७८

२४ जनवरी २०२१ – मैथिली जिन्दाबाद!!

एसोसिएशन औफ नेपाली तराईयन्स इन अमेरिका – एन्टा द्वारा काल्हि २३ जनवरी २०२१ नेपालक समय रात्रि ८ बजे सँ ११ः३० बजे धरिक समय मे अत्यन्त महत्वपूर्ण विषय पर उत्कृष्ट विमर्शक आयोजन कयल गेल। एन्टा एहि तरहक कार्य निरन्तर करैत आबि रहल अछि आर एहि मे मैथिली भाषा केन्द्रित विमर्श ओ चिन्तन बहुत सारगर्भित आ सान्दर्भिक होयबाक संग नेपाल केर आगामी जनगणना २०७८ साल जे आबि किछुए मासक बाद कयल जायत ताहि प्रति आम जनचेतना जागरणक कार्य सेहो करैत आबि रहल अछि।

काल्हि आयोजित कार्यक्रमक विषय “वर्तमान मे मैथिली भाषाक स्थिति आर नेपाली जनगणना-२०७८” पर संवाद एवं विचार-विमर्श भेल जाहि मे आत्मालोचनाक संग-संग भाषिक-साहित्यिक दायरा केँ बढेबाक, आमजन व बहुजनक बोली व शैली पर आधारित लेखन करबाक, व्याकरण आ शब्दकोश मे परिमार्जन, शिक्षा आ संचार मे मैथिली लागू करबाक, संविधान प्रदत्त अधिकार मुताबिक कम सँ कम प्रदेश २ मे सरकारी कामकाजक भाषाक रूप मे मैथिली केँ मान्यता प्रदान करब – एहि समस्त सन्दर्भित विन्दु पर विहंगम चर्चा विभिन्न भाषाविद्, साहित्यकार, अभियानी व आयोजक संस्थाक विज्ञजन लोकनि राखलनि।

ई आयोजनक अध्यक्षता एन्टा प्रेशिडेन्ट डा. इन्द्रदेव साहु आ संचालन एन्टा स्पोक्सपर्सन मोहन यादव द्वारा कयल गेल। एहि मे मुख्य अतिथिक तौर पर नेपाल प्रज्ञा प्रतिष्ठानक प्राज्ञ परिषदक आजीवन सदस्य आ सुप्रसिद्ध भाषा वैज्ञानिक प्रा. डा. योगेन्द्र प्रसाद यादव उपस्थित छलाह। तहिना विशिष्ट अतिथि आ भाषा-साहित्य संग सम्पूर्ण मैथिली-मिथिलाक विज्ञ ज्ञाता प्राज्ञ रामभरोस कापड़ि भ्रमर तथा इंजीनियर सत्यनारायण साह केर उपस्थिति आ प्रस्तुति वेबिनारक मुख्य आकर्षण रहल। भाषा-साहित्यक अभियान संग संचारक्षेत्र मे विशेष योगदान देनिहार नेपाली टेलिविजन पत्रकार श्यामसुन्दर यादव ‘पथिक’ एवं मैथिली जिन्दाबादक सम्पादक प्रवीण नारायण चौधरीक सहभागिता छल। तहिना नेपाल सँ भाषा-संस्कृति व विभिन्न सामाजिक अभियान मे निरन्तर कार्य कयनिहार भोर केर संस्थापक अध्यक्ष राजकुमार महतो संग युवा अभियानी लोकनि संतोष कुमार साह, कतारक दोहा सँ राम अधिन सम्भव, सप्तरी सँ गजेन्द्र गजुर, लहान सँ हृदय नारायण यादव एहि कार्यक्रम मे वक्ता-विचारक केर रूप मे भाग लेलनि। भारत सँ विद्वान्-साहित्यकार आ लोकसाहित्य मर्मज्ञ डा. महेन्द्र नारायण राम, वीरगंज सँ इतिहासविद् प्रा. डा. वासुदेवलाल दास – ई दुइ गोटेक विशिष्ट उपस्थिति अपेक्षित रहितो तकनीकी कारण सँ हिनका लोकनिक उपस्थिति नहि भऽ सकल छल।

एन्टा (आयोजक) अमेरिकाक प्रतिनिधित्व करैत विशिष्ट वक्ता लोकनि मे पास्ट प्रेशिडेन्ट विजय सिंह, यूएन धरि मैथिलीक प्रतिनिधित्व कयनिहार व्यक्तित्व डा. राम कृष्ण साह, एन्टा मेम्बर डा. रविन्द्र मंडल तथा इन्जा अध्यक्ष (पत्रकार) गुणराज लुइटेल केर उपस्थिति अति विशिष्ट रूप सँ आ सहयोग लेल सेहो छल। एहि कार्यक्रम केर लाइव प्रसारण कुल ९ गोट मीडिया द्वारा भेलैक जे गुणराज लुइटेलजीक सहयोग सँ भेलैक। ईनेपलीज, सागरमाथा टीवी, नेपाली डायस्पोरा, ग्लोबल नेपाल टीवी, युरोप प्लस, नेपाल पाठशाला जापान, आदिक संग एन्टाक आफिसियल पेज सँ एकर प्रसारण कयल गेलैक।

कार्यक्रम मे रामभरोस कापड़ि भ्रमर द्वारा सविस्तार मैथिलीक वर्तमान अवस्था पर प्रकाश दैत स्पष्ट कयल गेलैक जे कतिपय कारण सँ बहुसंख्यक भाषाभाषी मे सन्देहक अवस्था छैक। व्याकरण, मानक, वर्तनी मे गड़बड़ी जे परम्परागत रूप सँ मैथिली लेल विकसित भेल छैक से एकर मूल कारण थिकैक। तहिना मैथिली लेल जैह किछु अवसर राज्य द्वारा अकादमिक तौर पर देल जाइत छैक ताहि ठाम सेहो भाषिक दूरीक नाम पर किछु खास लोक द्वारा वैयक्तिक स्तर पर हावी हेबाक कारण सन्देह आर बेसी गहींर भेलैक। आर एहि सब कारण एकटा अलग भाषिक पहिचान ठाढ करबाक खतरनाक परिणामदायी अवस्था बनि जेबाक विन्दु पर ओ प्रकाश देलनि। एहि लेल आवश्यक सुधार लेल पाठ्यक्रमक विकास मे बहुसंख्यकहि द्वारा प्रयुक्त भाषा-बोली-शैली केँ स्थान देबाक संग सरकारी अवसर मे सेहो सर्वसमावेशिकता केँ अपनेबाक विन्दु सब पर सुझाव रखलनि। विद्वत् कार्य लेल व्याकरण केँ पुनर्लेखन करबाक आ शब्दकोश केँ सेहो आमजनक बोली सब केँ समेटैत परिमार्जित रूप रखबाक दिशा मे सेहो ओ अपन मन्तव्य रखलाह। एहि लेल योग्य व्यक्ति आ गुरुजन प्रा. डा. योगेन्द्र प्रसाद यादवक ध्यान सेहो ओ बीच-बीच मे आकर्षित करैत रहल छलाह, कारण आधिकारिक तौर पर परिवर्तन मे डा. यादवक सहयोग अति आवश्यक अछि, भाषा वैज्ञानिक केर तौर पर सेहो आ नेपाल सरकारक उच्च परामर्शदाताक तौर पर सेहो।

प्राज्ञ रामभरोस कापड़ि भ्रमर केर सम्बोधन (पूर्ण पाठ)

राम भरोस कापड़ि भ्रमर – जे काज स्थानीय स्तर पर मैथिली लेल हेबाक चाही से काज एन्टा द्वारा भेल अछि, ई बहुत पैघ सन्देश छैक सभक लेल। भाषा-साहित्यक स्थापना आ विकास लेल जनगणना मे स्थान सुरक्षित राखब जरूरी छैक। जनगणना बड पैघ अवसर होइत छैक सामान्यतया। लेकिन नेपाल मे मैथिली लेल अवस्था कनेक असामान्य अवस्था बनि रहल छैक। ताहि हेतु हमरा सब केँ सतर्कतापूर्वक विचार करबाक अछि। एन्टा एहि कार्य केँ बखूबी पूर्णता दिश लय जा रहल अछि। एम्हर नेपाल मे सेहो शुरुआत भऽ गेल छैक। कथा, कविता, उपन्यास बहुत लिखलहुँ, लिखबे करब। एखन नेपाल मे मैथिलीक अवस्था पर विचार करब बहुत आवश्यक छैक। मैथिली लेल एक सामान्य नागरिक केर दृष्टि सँ हम दू टा बात देखि रहल छी – एकटा सामाजिक-राजनीतिक स्तर पर आ दोसर वैयक्तिक स्तर पर।

कार्यक्रम मे आगू कि सब भेल – 

सभाध्यक्ष डा. इन्द्रदेव साहुक अध्यक्षीय सम्बोधन – 

एन्टा दिश सँ मोहन यादव जी केँ बहुत धन्यवाद – अत्यन्त सारगर्भित रूप सँ ई कार्यक्रमक संयोजन-आयोजन व प्रस्तुति लेल मोहनजी प्रति हृदय सँ आभार। नेपाल मे सुतय केर समय रहितो सब गोटे जुड़िकय एहि कार्यक्रम केँ सफल बनेलहुँ – एन्टा एहि लेल कृतज्ञतापूर्वक धन्यवाद दैत अछि। प्रा. डा. योगेन्द्र सर, प्राज्ञ रामभरोस कापड़ि सर, प्रवीण सर व समस्त विज्ञजन केँ अपना आ एन्टा दिश सँ बहुत धन्यवाद दैत छी।

आजुक कार्यक्रम मे बहुत रास बात सब एलैक अछि। हम मैथिली भाषाक एक्सपर्ट त नहि छी, लेकिन अपन भाषा-संस्कृति केँ केना बढाबी से हमरा सभक लक्ष्य छैक। एन्टाक मिशन आइडेन्टिटी, इन्टीग्रेसन आ इम्पावरमेन्ट – अपन पहचान केँ जाबत आगाँ नहि अनबैक त आत्मसम्मान नहि बढत, समाज विकसित नहि होयत। पहचान मे भाषा बड पैघ चीज होइत छैक। अमेरिका मे सेहो बहुतो तरहक आइडेन्टिटी वला लोक सब रहैत अछि, लोकल स्तर पर एतय सेहो कोलोकियल अंग्रेजी केर प्रयोग सामान्य स्तर पर होइत छैक। झापा सँ रौतहट तक मे बोली मे फर्क एनाय स्वाभाविके छैक।

आधुनिकता सँ भिजला पर डायनामिक हेतैक। एजुकेशन, अवेयरनेस, ई सब बड पैघ बात होइत छैक। परिवर्तन अपना आप सँ शुरू करू। अपन मातृभाषा प्रति जागरुक व्यक्तिगत स्तर पर हेतैक तखनहि परिवार मे अपन धियापुता आ आसपड़ोस सब मे चेतना वृद्धि हेतैक। अमेरिका मे रहितो हम सब अपन घर मे अपने भाषाक प्रयोग करैत छी, जाहि सँ बाल-बच्चा सब मे भटकाव नहि आबय। बहुत रास काज भऽ रहलैक अछि। पोजिटिविटी केँ लय कय आगू बढय पड़तैक। अपन-अपन जगह सँ सब कियो योगदान देल जाउ। एन्टा अपन संस्कृति, भाषा, समाज, पहिचान केँ आगू बढेबाक लेल – जनचेतना आ जनजागरणक आरो-आरो काज सब आगू निरन्तर करैत रहबाक वचनबद्धता, एन्टा एकरा आगू बढबैत रहत। पोजिटिविटी संग आगामी जनगणना लेल सब कियो प्रयास करय जाउ यैह अपील।