दहेज मुक्त मिथिला लेल उद्यमी-व्यवसायी द्वारा अपन नामक बैनर मार्फत नाराक प्रचार

माँगरूपी दहेज केर प्रतिकार करू, स्वेच्छाचार धर्म केँ बढावा दैत आपस मे कुटमैती जेहेन पवित्र सम्बन्ध कायम कय आगाँक पीढी-सन्तति केँ धराधाम मे आबय दियौक।

– दहेज मुक्त मिथिला अभियान

किछु दिन पहिने ‘दहेज मुक्त मिथिला’ ग्रुप पर अगबे अपन उद्यम या कीर्ति आदिक विज्ञापन होइत देखने रही। एकाएक मोन मे फुरा गेल जे कियैक न हिनका लोकनि सँ सेहो किछु सहयोग करबाक लेल अनुरोध करी। कहलियनि जे प्रिय सदस्य लोकनि, जे कियो दहेज मुक्त मिथिला केर समूह मे अपन उद्यम-प्रतिष्ठान वा कोनो तरहक कीर्ति आदिक विज्ञापन करैत छी त संगे-संग एकटा काज आरो कय देल करू…. कृपया अपन-अपन प्रतिष्ठानक विज्ञापन वला बोर्ड (बैनर) मे दहेज मुक्त मिथिलाक नारा “माँगरूपी दहेज नहि ली आ नहि दी” केर संग ‘बेटा-बेटी एक समान, दुनू केर होइ एक्कहि मान” आदिक प्रचार सेहो कय दी।